اقتوبە وبلىسىندا مەملەكەتتىك ءتىلدى ۇيرەنۋگە بارلىق جاعداي جاسالعان. بۇل تۋرالى وڭىرلىك كوممۋنيكاسيالار قىزمەتىندە اقتوبە وبلىسىنىڭ تىلدەردى دامىتۋ باسقارماسىنىڭ باسشىسى گۇلايىم تولەبايەۆا مالىمدەدى دەپ حابارلايدى Qamshy.kz اقپارات اگەنتتىگى اقتوبە وبلىسىنىڭ وڭىرلىك كوممۋنيكاسيالار قىزمەتىنە سۇيەنە وتىرىپ.
قازىرگى ۋاقىتتا وڭىردە تىلدەردى قولدانۋ مەن دامىتۋدىڭ مەملەكەتتىك باعدارلاماسىنىڭ ءىىى كەزەڭى اياسىندا ءىس شارالار كەشەنى جۇزەگە اسىرىلۋدا.
گ. تولەبايەۆانىڭ ايتۋى بويىنشا، قالامىزداعى ەرەسەك تۇرعىنداردىڭ مەملەكەتتىك ءتىلدى ۇيرەنۋى ءۇشىن بارلىق جاعداي جاسالعان. جالپى العاندا تىلدەردى دامىتۋ ورتالىعى مەملەكەتتىك، ورىس جانە اعىلشىن تىلدەرىن ۇيرەتۋ كۋرستارىمەن 14 مىڭ ادامدى قامتىپ، ولارعا بىرنەشە دەڭگەي بويىنشا قاشىقتىقتان وقىتۋ جۇيەسىن ازىرلەپ وتىر.
«وزگە ۇلت جاستارىنىڭ اراسىندا تولەرانتتى ورتا قۇرۋ ماقساتىندا مەملەكەتتىك جانە انا تىلدەرىن ۇيرەنۋگە جاعداي قاراستىرىلعان. بۇگىنگى كۇنى 4 مىڭعا جۋىق ءار ءتۇرلى ەتنوس وكىلدەرى جەكسەنبىلىك مەكتەپتەردە ءبىلىم الدى. جۇيەلى جۇمىس ناتيجەسىندە حالىقتىڭ نەگىزگى بولىگى وبلىستاعى ءتىل احۋالىن وڭ باعالاسا، ال قازاق ءتىلىن مەڭگەرگەن حالىقتىڭ ۇلەسى تۇراقتى تۇردە ءوسىپ كەلەدى. سونىمەن قاتار، وبلىسىمىزدا تۇراتىن جوعارى بۋىن وكىلدەرىنىڭ 93%، سونداي-اق ورىستار 93،8 %، اعىلشىندار 26،6%، ال مەملەكەتتىك ءتىلدى مەڭگەرگەن وزگە ۇلت وكىلدەرىنىڭ ۇلەسى 45% - دى قۇرايدى»، - دەدى باسقارما باسشىسى.
ايتا كەتۋ كەرەك، وڭىردە بالالاردىڭ العاشقى تىلدىك داعدىلارىن دامىتاتىن «كۇنشۋاق» بالالار جۋرنالى، «مەن ءۇش تىلدە سويلەيمىن» بالالارعا ارنالعان سوزدىك، سونىمەن قاتار، "تىلدەردى وقىتۋ: ىزدەنىس جانە ادىستەمە" اقپاراتتىق-ادىستەمەلىك جۋرنالى شىعارىلادى.
سونداي–اق ۇلتتىق ونوماستيكالىق كەڭىستىكتى قالىپتاستىرۋ ءۇشىن تولىق عىلىمي نەگىز قۇرۋ جونىندە شارالار قابىلداندى. تاۋەلسىزدىك العان كۇننەن باستاپ قازىرگى ۋاقىتقا دەيىن 167 ەلدى مەكەننىڭ 146-نا تاريحي اتاۋلارى قايتارىلدى.
«جالپى العاندا مونيتورينگتىك جانە ءتۇسىندىرۋ جۇمىستارىنىڭ ناتيجەسىندە ءتىل زاڭناماسى سالاسىنداعى قۇقىق بۇزۋشىلىقتار سانى ايتارلىقتاي تومەندەدى »-دەپ، مالىمدەدى گۇلايىم تولەبايەۆا.
